Գլխավոր էջԳլխավոր էջ
Քննչական կոմիտեի հասցեն
ք. Երևան, Մամիկոնյանց 46/5+374(11) 880-151
ԻՆՉՊԵ՞Ս ՀԱՍՆԵԼ

Դատագենետիկական փորձաքննության արդյունքն առանցքային նշանակություն ունի հանցագործությունների բացահայտման գործում. Հայկ Գրիգորյան (լուսանկարներ)

24.05.2019 14:18

Հայաստանի Հանրապետության քննչական կոմիտեի նախագահ Հայկ Գրիգորյանն այսօր  ՀՀ ԱՆ «Դատաբժշկական գիտագործնական կենտրոն» ՊՈԱԿ-ի Դատագենետիկական  փորձաքննությունների բաժնի վերաբացման արարողության ժամանակ հանդես է եկել ելույթով:

ՔԿ նախագահի ելույթն ամբողջությամբ ներկայացնում ենք ստորև.

ՀՀ քննչական կոմիտեի ստեղծման պահից շուրջ 5 տարի է քննչական կոմիտեի քննիչները սերտ համագործակցում են «Դատաբժշկական գիտագործնական կենտրոն» ՊՈԱԿ-ի փորձագետների հետ:

Ցանկացած հանցագործության բացահայտումը քննիչների, ոստիկանների և փորձագետների արդյունավետ աշխատանքների և համագործակցության հետևանք է:

Գործողությունների միասնության, ճիշտ պլանավորված քննչական, օպերատիվ-որոնողական և փորձագիտական գործողությունների համակցված աշխատանքի արդյունքում է հնարավոր բացահայտել հանցագործությունը տաք հետքերով:

Դատագենետիկական փորձաքննությունը փորձաքննությունների տեսակների մեջ համեմատաբար երիտասարդ է, սակայն այսօր հնարավոր չէ պատկերացնել մարդու կյանքի և առողջության դեմ ուղղված հանցագործության բացահայտումն առանց դատագենետիկական փորձաքննության արդյունքի, որն առանցքային նշանակություն ունի հանցագործությունների բացահայտման գործում:

Կենտրոնի մոլեկուլային գենետիկայի փորձաքննությունների բաժինը միակն է Հայաստանի Հանրապետության տարածքում, որն իրականացնում է ԴՆԹ-ի միջոցով անձի նույնականացման փորձաքննություններ:

Շնորհիվ դատագենետիկական փորձաքննության արդյունքների՝ բացահայտվել են բազմաթիվ հնչեղ գործեր, օրինակ՝ «Պերմյակովի», «Զինված հանցախմբի», «Ավտոբուսի պայթյունի» և այլն:

Սակայն այդ ընթացքում եղել են նաև գործեր, որոնց բացահայտման համար Ձեր հնարավորությունները եղել են սահմանափակ և դա պայմանավորված է եղել անհրաժեշտ նոր սերնդի սարքավորումների բացակայությամբ:

Շատ կարևոր է այսօր հանցագործության բացահայտումը տաք հետքերով, մի քանի ժամերի ընթացքում, անհայտ դիակների նույնականացումը ոսկրերով, ԴՆԹ խառնուրդների նույնականացումը, ԴՆԹ որոնողական բազայի ստեղծումը:

Ուրախ եմ կենտրոնի վերազինման համար և վստահ եմ, որ այսուհետ մենք կունենանք դատագենետիկական փորձաքննությունների նոր որակ:

Շնորհավորում եմ ձեզ՝ բաժնի վերաբացման կապակցությամբ, ցանկանում բեղմնավոր աշխատանք և նորանոր հաջողություններ փորձագիտական ոլորտում:


Մեկնաբանություններ
Ձեր էլ.հասցեն մնում է գաղտնի